- Ní mé an ar Áit an Phuint nó na Cúig Déag atá mé curtha.- Faoi thalamh atá tú ar aon chaoi.- Faoi thalamh?- Chaith siad isteach i bpoll thú.
- Dúirt mé leo an chónra ab fhearr tigh Thaidhg a fháil.
- Tá an t-ádh ort gur aimsigh siad do chnámha fiú.
- Cuir ar Áit an Phuint mé.
- Tá go leor istigh anseo anois nach bhfuil ach bráillín caite thart orthu.
- An chónra ab fhearr.
- Agus tá daoine eile ann nárbh fhiú an bráillín féin dóibh.
- Mharaigh siad mé.
- Shaor siad thú.
- Is ionann é.
- Ní raibh muid ag caint leatsa. Is comhrá príobháideach é seo.
- Tá mise i mo luí anseo oiread chéanna libh féin.
- Comhrá príobháideach é seo.
- Arú, tá mise i mo luí anseo le dosaen bliain gan chomrádaí ná chara.
- Labhair leat, más ea.
- Mharaigh siad mise an uair dheireanach.
- Conas?
- Tarracóir mór millteach a charn an gaineamh mar shliabh os mo cheann. Bádh mé - ar thalamh tirim.
- Mharaigh siad thú.
- Ní raibh mise ag iarraidh dul san arm. Saddam a thug orm.
- Mo ghrá é Saddam. Sin é an buachaill acu...
- Má bhuailtear Sasana, beidh an tír in ainriocht.
- A Chineál Thexas na Leathchluaise, is tú a d'fhág anseo mé leathchéad bliain roimh an am. Bhí an buille feille riamh féin i gcineál na Leathchluaise. Sceana, clocha, agus buidéil. Ní throidfeá mar a throidfeadh fear ach mé a shá...
- Scrios air mar Saddam. Thug sé mo bhás.
- Agus mise.
- Agus mise.
- C'ainm atá ar an leanbh sin?
- Cá bhfios? Níl labhairt aici.
- Saddam?
- Ní hé. Marines.
- Mharaigh siad í.
- Shaor siad í.
- Is ionann é.
- An beo nó marbh atá mé? An beo nó marbh atá siad seo? Cén chiall an chathaíocht seo i gcré na cille?
- Súil agam nach gcorraíonn siad mo chnámha.
- Cad chuige a gcorródh?
- Tá caint ar ola bheith sa chill seo.
- Ola?
- Tá muid saibhir.
- Tá muid marbh.
- Cén dath atá ar ola?
- Dubh.
- Ní fheicim ach dearg.
- An mbogfaidh siad muid?
- Nach cinnte go mbogfadh lena gcrúba a fháil ar ola?
- Shaor siad thú.
- Mharaigh siad mé.
- Ola! Ola! Tá muid saibhir.
- Ní bheidh lá ocrais orainn go deo.
- Dúirt tú é.
- An bhfaca duine ar bith ola thíos anseo?
- Ní fhaca ach gaineamh
- Agus créafóg...
- Agus ithir...
- Agus fuil...
- An chónra ab fhearr.
- Tá do chnámha féin agat. Is méanar duit.
- Crothnaím mo chnámha.
- Agus mo chraiceann.
- Tá muid saibhir.
- Níl a fhios agam ab é lá Fhéile Pádraig nó an lá ina dhiaidh sin a fuair mé bás.