TÁ RAIDIÓ RTÉ agus Recorded Actors Artists Performers (RAAP), ag cur ceithre sparánacht ar fáil do cheoltóirí atá ag tosú amach ina ngairm cheolmhar.
Tá €5,000 le bronnadh ar dhuine amháin i ngach ceann de na réimsí seo: ceol clasaiceach; ceol rac/pop; ceol tíre agus ceol traidisiúnta. Is é is cuspóir leis an chiste deis a thabhairt dóibh dul chun cinn a dhéanamh.
Níl na sparánachtaí dírithe ar chumadóirí ach ar dhaoine a chuireann ceol agus amhráin i láthair lucht éisteachta, is cuma cé acu a chum siad an ceol nó nár chum. Tá na moltóirí ar lorg ceoltóirí agus amhránaithe a bhfuil scil acu sa cheol ach caithfidh go mbeidh tóir ag an lucht éisteachta ar an cheol fosta.
Le cois an airgid, beidh seans ag na buaiteoirí poiblíocht a fháil dá gcuid ceoil ar cheithre stáisiún raidió FM RTÉ – Raidió na Gaeltachta, Lyric FM, Radio 1 agus 2fm. Is í an Aoine 26ú Lúnasa an spriocdháta agus fógrófar na buaiteoirí le linn Sheachtain Mhór Cheoil RTÉ, a bheidh ar siúl idir 10ú agus 16ú Deireadh Fómhair.
* Eolas: www.rte.ie/breakthrough