Bhronn Ollscoil na hÉireann, Má Nuad, céimeanna oinigh ar Dhiarmuid Breathnach agus ar Mháire Ní Mhurchú, údair na sraithe, Beathaisnéis, Dé hAoine seo caite.
Dochtúireacht le Léann Ceilteach a bronnadh ar an bheirt as an obair mhór a rinne siad ag carnadh eolais ar phobal na Gaeilge.
Tá breis agus 20 bliain caite acu ar thaighde agus ar fhoilsiú na sraithe, bailiúchán cuimsitheach ar dhaoine a thacaigh le caomhnú na teanga.
Tá cur síos ar níos mó ná 1,000 duine a ghlac páirt in Athbheochan na Gaeilge le fáil sna himleabhair éagsúla. Tá corpus imleabhar foilsithe cheana ó 1560 go dtí 1982 agus imleabhar ó 1982-2002 le teacht.