Bhuaigh Cumann Cultúrtha Mhic Reachtain, Béal Feirste, comórtas náisiúnta Ghlór na nGael, 2003. Bhronn an Coimisinéir Teanga, Seán Ó Cuirreáin, trofaí Ghlór na nGael agus seic €13,300 ar chathaoirleach an chumainn, an Dochtúir A.J. Hughes, ar ócáid i mBaile Átha Cliath Dé Luain.
Is sa Loiste Úr i dtuaisceart Bhéal Feirste atá Cumann Cultúrtha Mhic Reachtain lonnaithe, áit a bhfuil go leor fadhbanna sóisialta agus ráta ard dífhostaíochta. Rinne an cumann iarrachtaí an pobal ar fad - idir Chaitlicigh agus Phrotastúnaigh - a mhealladh i dtreo na teanga.
Dúirt Hughes go gcuirfeadh "an t-aitheantas go mór le díograis an chumainn agus iad i mbun obair na Gaeilge agus an obair trasphobail atá ar bun le hIontaobhas 174 chun úinéireacht na teanga a bhronnadh ar phobal uilig an cheantair."