Tá Ollscoil na hÉireann, Gaillimh, le hAcadamh Ollscolaíochta na Gaeilge a bhunú i ndiaidh gur cheadaigh an tAire Éamon Ó Cuív deontas €1 milliún don togra arú inné.
Cuirfidh an tAcadamh cúrsaí trí mheán na Gaeilge ar fáil ar an champas i nGaillimh agus in ionaid Ghaeltachta. Mar chuid den athrangú ollscoile, cuirfear Oifig na Gaeilge Labhartha agus gníomhaíochtaí na n-ionad Gaeltachta faoi scáth an Acadaimh.
Daichead duine atá fostaithe go lánaimseartha san Acadamh faoi láthair ach tá súil ann tuilleadh a fhostú de réir mar a fhobraítear cúrsaí nua. Tá 12 post fógraithe agus tuilleadh le fógairt go luath.
I bpreasráiteas, dúirt uachtarán na hollscoile, an Dochtúir Iognáid Ó Muircheartaigh, gur chúis áthais dó an tacaíocht "láidir Rialtais" a tugadh don "ghníomhaíocht cheannródaíoch" seo agus gur chéim eile í i dtreo ghníomhú phlean straitéiseach na hollscoile áit suntasach a thabhairt don Ghaeilge agus don léann trí mheán na Gaeilge.
Shocraigh údaráis na hollscoile ag cruinniú an mhí seo caite gur cheart go mbeadh campas "eiseamláireach dátheangach" acu, campas a bheadh ina "dhea-shampla d'ollscoileanna atá ag freastal ar phobail mhionlaigh agus ar phobail mhionteangacha ar fud na cruinne".
Dúirt Éamon Ó Cuív gurbh é an t-oideachas "an fheithicil is tábhachtaí, seachas an teaghlach féin, chun an Ghaeilge a choiméad beo bríomhar sa Ghaeltacht". Ba chuid lárnach de bhuanú na teanga é go mbeadh cúrsaí tríú leibhéil ar fáil do phobal na Gaeltachta ina dteanga dhúchais. "Cumasú pobail" a bhí i gceist leis an "tionscadal tábhachtach" seo, tionscadal a bhí riachtanach chun go mairfeadh an réigiún mar cheantar sainiúil teanga.