Sheol Cathal Póirtéir, léiritheoir agus file, dhá leabhar nua ón chomhlacht foilsitheoireachta Comhar agus eagrán liteartha Nollag na hirise oíche Luain i mBaile Átha Cliath.
Ba é Míle Murdar (€6.80) le Micheál Ó Ruairc agus Clann na nÉan/Ríocht na Cailce (€6.20) le Gabriel Rosenstock an dá leabhar. Tá leabhar Uí Ruairc dírithe ar an fhoghlaimeoir fásta. Comhlacht atá i Míle Murdar a ghearrann táille ar dhaoine chun dúnmharú bréagach a fhiosrú. Scéal eile ar fad é nuair a thagann na bleachtairí amaitéaracha ar bheirt atá marbh. Dhá scéal don déagóir atá i saothar Rosenstock. I ndomhan faoi thalamh atá Clann na nÉan suite, áit a bhfuil díorma daoine óga ar iarraidh go hoifigiúil ach atá á n-oiliúint ag pearsa dhiamhair darb ainm An Fiolar.Baineann Ríocht na Cailce le garsún a mbíonn éifeacht ait ag an chlár dubh air nó ag a mbíonn scríofa le cailc ar an chlár dubh. Eolas: 01-6785443